Xixón (Europa Press).-El presidente de la comisión xestora del Conseyu Regulador de la Denominación d'Orixe Protexida de la Sidra, Ceferino Cimadevilla, refugó esti miércoles que la típica bebida asturiana puea considerase una droga. Cimadevilla refugó que puean metese toles  bebíes "nel mesmu sacu" y confió en que nun llegue a afectar "mui negativamente" a la sidra la futura Llei de Drogues del Principáu que se ta tramitando.

   Asina lo indicó a los medios de comunicación tres la presentación d'una nueva campaña del Conseyu Regulador de la Sidra de Denominación d'Orixe na Colexata de San Juan Bautista de Xixón, de la que resaltó la baxa graduación d'alcohol d'esta bebida asturiana.

   Amás, vio contradictoria que se quiera promover per un llau la sidra como Patrimoniu de la Humanidá y, per otru que se pretenda incluyir na Llei de Drogues. Cimadevilla insistió en que nun comparte que la sidra seya una droga y calcó en que más que nos graos d'alcohol, el problema taría na cantidá consumida.

   Unío a ello, destacó qu'esti añu n'Asturies en cada campaña de sidra DOP prodúcense dos millones de llitros de 24 llagareros. Nesti puntu, recordó qu'esta sidra faise solo de 22 mazanes escoyíes, a lo qu'añadió que cada vez hai más xente que quier producir estes variedaes, a les que podríen añadir otres trés nueves nun futuru próximu. Ello ye que calcó en que'l Conseyu Regulador marcó requisitos más fáciles de cumplir de forma que puea aumentar el númberu de productores.