Palma Mallorca, 25 de Xunu (E. P.)

   El titular del Xulgáu d'Instrucción númberu 3 de Palma, José Castro, punxo esti miércoles fin a la instrucción del casu Nóos tres cuatro años d'investigaciones, y acordó caltener la imputación de la Infanta Cristina por presuntu blanquéu de capitales y como cooperadora necesaria de dos delitos fiscales. El xuez abre asina la vía pa que la duquesa de Palma puea sentase nel banquín de los acusaos.

   Asina lo decretó per mediu d'un autu, conocíu como pase a procedimientu acortáu, nel que tamién da'l primer pasu pa qu'Iñaki Urdangarin se siente nel banquín. Trátase d'una resolución contra la que cabe interponer tanto recursu de reforma --ante'l mesmu Xulgáu-- como d'apelación -directamente ante l'Audiencia Provincial de Baleares--.

   En concreto, Castro considera a la hermana del rei cooperadora necesaria de los dos delitos fiscales que cometería'l so home, al caltener que'l so papel foi imprescindible pa qu'Urdangarin pudiera defraudar hasta un total de 337.138 euros nes cuotes del IRPF correspondientes a los años 2007 y 2008. Y fízolo al traviés de la sociedá de la qu'ambos son propietarios, Aizoon, al facturar al traviés de la mesma -como rindimientos d'actividaes económiques- les retribuciones que cobró d'entidaes privaes pola so condición de conseyeru asesor.

   Too ello, según la Fiscalía y l'Axencia Tributaria, coles mires de tributar menos na so declaración de la renta. El mesmu Castro considera Aizoon como una sociedá pantalla de la que se valió l'home d'Urdangarin pa cobrar les asesoríes como si de rindimientos profesionales tratárase y non de servicios personales. Ye más, Aizoon yera una de les empreses ficticies qu'integraben la filaza societaria dirixida a esviar los fondos llograos per parte del Institutu Nóos de les Alministraciones públiques.

   En cuanto al delitu de blanquéu, el maxistráu apunta a que Cristina, como socia al 50 por cientu d'Aizoon, aprovechase d'estos ingresos presuntamente ilícitos al destinar el dineru que la so sociedá percibió de Nóos a gastos particulares del matrimoniu, como la reforma de la so vivienda familiar, cola conocencia del so orixe delictivu.