Madrid (Europa Press) .-L'Audiencia Nacional va estudiar el próximu mes de xunetu la querella presentada pol partíu Soberanía contra'l rei Juan Carlos y l'expresidente del Gobiernu Felipe González, ente otros, pola so presunta participación na denominada filaza civil' del golpe d'Estáu del 23-F, informaron fontes xurídiques.

   La Estaya Segunda de la Sala de lo Penal fixara pa esti martes la deliberación sobre'l recursu que la formación, liderada pol abogáu José Luis Mazón, presentara contra la inalmisión de la so primer querella, que refugó'l xuez Santiago Pedraz.

   Sicasí, los maxistraos nun trataron el fondu de la cuestión porque tamién van tener qu'estudiar una ampliación de la querella, refugada a primeros d'esti mes de xunu pol xuez instructor argumentando que Juan Carlos siguía siendo inviolable hasta que les Cortes Xenerales aprobaren la llei orgánica que regula la so abdicación de la Corona.

   La querella, apoyada nel relatu del 23-F que realiza la escritora Pilar Urbano nel so llibru 'La gran desmemoria', tamién ta dirixida contra l'exdiputáu socialista Enrique Múgica y l'antiguu políticu del Partíu Comunista d'España (PCE) Ramón Tamames. Na ampliación incluyóse un facsímil del documentu que firmó'l rei pa comunicar la so abdicación.

NUN HAI NICIOS DELICTIVOS

   El titular del Xulgáu Central d'Instrucción númberu 1 refugó en dambos casos l'acción penal interpuesta argumentando que nun existen nicios delictivos na actuación de los querellaos y que, en tou casu, el delitu de rebelión que s'atribúi prescribiría.

   "No que se refier a la inviolabilidá de la figura del rei, hasta que les Cortes Xenerales nun aprueben la Llei Orgánica que regule l'abdicación del xefe del Estáu, la so situación institucional y procesal nun se modificó", señalaba'l xuez.

   La Fiscalía pidió'l refugu "dafechu" de la querella destacando la so "inconsistencia y falta d'entidá xurídica", asina como'l fechu de que'l 23-F xulgóse y que los supuestos delitos que se pretenden agora investigar taríen prescritos al trescurrir "más de 20 años dende qu'asocedieron".