Bruxeles, 24 de Xunu (E.P.).- La presidenta del Frente Nacional, Marine Le Pen, y el cabezaleru del Partíu pola Llibertá holandés (PVV), Geert Wilders, fracasaron nel so oxetivu de formar un nuevu grupu d'estrema derecha anti-UE na Eurocámara al nun llograr sumar partíos bastantes.

   "Desafortunadamente, nun foi posible antes del plazu del 24 de xunu formar un grupu nel Parlamentu Européu con otros seis partíos", anunció Wilders, que sicasí mostróse convencíu de qu'a lo llargo d'esti añu va poder axuntar los apoyos necesarios. Hasta entós, Wilders y Le Pen van siguir trabayando cola Lliga Norte italiana, los flamencos Vlaams Belang y el Partíu de la Llibertá austriacu.

   La falta de grupu parlamentariu propiu va obligar a los eurodiputaos del Frente Nacional y del PVV a figurar ente los non inscritos. Ello significa que van perder financiación y van contar con menos tiempu de palabra en comisiones y nel plenu y con menos influencia nel repartu de cargos na Eurocámara.

   El líder del PVV esplicó que-y prestara contar con un grupu propiu pero non "a cualquier preciu". Asina, refugó la entrada del Congresu de la Nueva Derecha de Polonia, partíu consideráu misóxinu y antisemita, por considerar que trabayar con estos eurodiputaos yera "demasiao".

   Pa formar un grupu na Eurocámara requiérense un mínimu de 25 eurodiputaos de siete Estaos miembros. Le Pen llograra axuntar a 38 parlamentarios, pero namás de cinco países. Adelantóse-y el líder del Partíu Pola Independencia del Reinu Uníu, Nigel Farage, que sí llogró un grupu euroescépticu propiu con 48 eurodiputaos, ente ellos una disidente del Frente Nacional.