L’Asamblea Llexislativa de Bolivia va debatir dende esta selmana una llei que prevé reconocer el trabayu infantil dende los 14 años, pero con excepciones dende los 12 cuando existan autorizaciones de les autoridaes y de los padres.

“Establezse los 12 años pa los que trabayen por cuenta ayena (dependeinte d’un empleador), siempre y que tengan autorización de la Defensoría de la Neñez y de los padres”, explicó’l presidente de la Comisión de Constitución del Senáu bolivianu, Adolfo Mendoza.

La inda vixente Llei del Neñu, Neña y Adolescente señala los 14 años como la edá mínima pa trabayar, dalgo que fuera rechazao por un grupu de neños trabayadores qu’a finales de 2013 protagonizaron una protesta pa que se-yos autorizara trabayar con menos años.

El presidente de la Cámara de Senadores, Eugenio Rojas, explicó que s’alcordara cola Xunión de Neños y Neñes Trabayadores de Bolivia que los pequeños diben poder trabayar de los 14 años n’alantre, cola excepción que los que quixeran facelo dende los 12.

El representante de la Xunión de Neños y Neñes Trabayadores, Kevin Yucra, señaló que les excepciones son pa los que trabayen, por exemplu, na venta de golosines, curiando de vehículos, nel embolsáu de productos en supermercaos y pa neños que dependan d’un empleador. “La lley va protexenos a los neños y adolescentes trabayadores porque la xornada llaboral ye de seis hores y depués vamos poder estudiar, lo que ye un aspectu col que tamos conformes”, indicó’l dirixente mozu de 15 años.

L’Estáu bolivianu comprometióse a erradicar la explotación llaboral infantil que se rexistra na minería y la zafra. Los compromisos van ser ratificaos na nueva normativa, según prevén los llexisladores. Según datos del censu de 2001, alredor de 116 mil neños ente siete y 14 años trabayen nel país ensin nenguna prestación llaboral