Ta acabante de ver la lluz, na editorial Milenio, el llibru “Protest Song: la canción protesta en los Estados Unidos de los años sesenta”, de los franceses Yves Delmas y Charles Gancel, con prólogu de Diego A. Manrique.

Los autores son, amás d’expertos en cultura musical, profesionales reconocíos del ámbitu empresarial. Yves Delmas ye presidente de SEUR dende 2012 y Charles Gancel ye cofundador y presidente de ICM (InterCultural Management Associates) dende 1983, consultora d’estratexa institucional na qu’adquirió gran experiencia na identidá y cultura de marques internacionales.

El llibru nun ye un llibru d’hestoria, sinon d’hestories. El telón ábrese cola llegada de Bob Dylan a Nueva York en 1961 y piésllase con Joan Baez, que canta baxo les bombes americanes en Hanoi en 1972. Al filu de los fragmentos de la dómina, “Protest Song” estudia la revolución musical y social de los años sesenta al traviés del prisma de la canción contestataria de los Estaos Xuníos.

Una dómina atravesada per tres grandes mivimientos: la llucha polos derechos cívicos, la contracultura y la oposición a la guerra de Vietnán. Los amerindios, los xudíos, les muyeres, los afroamericanos y los izquierdistes respuenden coles sos canciones a la opresión de la que son víctimes nel país. Un percorríu por una dómina d’efervescencia y creatividá, na que cada acontecimientu políticu y social conviértese en canción.