El Partíu de los Trabayadores (PT) llanzó oficialmente esti sábadu una vuelta más la candidatura de la presidenta brasileña, Dilma Rousseff, a la reellección nos comicios del 5 d’ochobre que vien. Procamólo asina’l presidente del partíu, Rui Falcao, na convención realizada en Brasilia, nun palcu atacáu d’estrelles roxes, símbolu del partíu, y flanqueáu por grandes fotos de la mandataria.

El llanzamientu de la candidatura fízose por aclamación d’unos 800 delegaos, cola presencia del padrín políticu de Rousseff, l’ex presidente Luiz Inacio Lula da Silva (2003-2010), y de la propia mandataria.

Metanes la Copa’l Mundu, l’actu convirtióse nuna defensa de la organización del máximu tornéu del fútbol internacional y d’una axenda de cambios pal siguiente mandatu presidencial, en clara respuesta a les protestes caleyeres qu’irrumpieron en Brasil l’añu pasáu escontra los elevaos gastos públicos pal mundial, que bien de brasileños pretendíen que se destinaran a meyores servicios públicos y tamién escontra la corrupción y por cambios nel sistema políticu.

Los delegaos tamién aclamaron al líder máximu del partíu y ex presidente Lula da Silva, que dexara’l poder col 80% de popularidá nes encuestes. L’ex mandatariu va participar na campaña pola reellección de Rousseff.

Nos momentos nos que l’actual presidenta perdía popularidá, aliaos del PP ya incluso voces dientro del propiu partíu defendieron una nueva candidatura de Lula, en reemplazu de Rousseff. Ex guerrillera durante la dictadura, la presidente, de 66 años, que llagara al poder en 2011, ye favorita a la rellección col 39% de la intención de votu, por más que perdiera popularidá nos últimos tiempos.