Uviéu (E.P.).-El plenu de la Xunta Xeneral del Principáu d'Asturies (XXPA) aprobó esti vienres una moción d'IU que solicita al Gobiernu central qu'impulse "de manera decidida" el corredor ferroviariu Madrid-Lleón-Xixón. La iniciativa esixe la puesta en marcha de la variante de Payares en serviciu nel 2015, con usu mistu de viaxeros y mercancíes.

   La moción aprobóse colos votos de PSOE, PP, IU y Grupu Mistu (32 votos). Foru (12 votos) decidió a lo último astenese. El so diputáu Pelayo Roces esplicó que tomaron la decisión al ver refugaes los sos cinco enmiendes, que significaben un mayor nivel de detalle y suponíen "mayor contundencia".

   Sicasí, el voceru d'IU, Aurelio Martín, dixo na so intervención que nun aceptaba les enmiendes de Foru porque significaben "otra iniciativa" cola que, sicasí, tamién podía tar d'acuerdu.

   Martín dixo que la so moción basóse na declaración pactada'l 31 de mayu en Lleón, onde se fixaron unos "oxetivos inmediatos". La iniciativa aprobada pide al Gobiernu central que resuelva'l problema de la configuración del denomináu 'fondu de sacu' de la estación de Lleón y que se resuelva mentanto esa penalización cola puesta en serviciu de, polo menos, un tren directu diariu en cada sentíu.