Felipe VI quier ser un referente de "la exemplaridá" que, "con toa razón" demanden los ciudadanos. L'acabante de proclamase rei d'España nes Cortes Xenerales manifestó la so intención de ganase "el respetu y confianza" de los ciudadanos y pa ello aseguró que velará por "caltener el prestixu de la institución", con una conducta "íntegra, honesta y tresparente".

   Mientres el so primer discursu como rei, Felipe VI garantizó que la corona fairáse acreedora de "l'autoridá moral necesaria pal exerciciu de les sos funciones".

   Asina, proclamó la independencia de la Corona, la so neutralidá política y la so vocación integradora ante "les distintes opciones ideolóxiques", que-y permitan contribuyir a la "estabilidá" del nuesu sistema políticu, y a facilitar "l'equilibriu colos demás órganos constitucional y territorial".

   Felipe VI faló en dos ocasiones d'una Monarquía renovada pa "un tiempu nuevu". "Y encaro'l mio llabor con enerxía, con ilusión y col espíritu abiertu y renovador qu'inspira a los homes y muyeres de la mio xeneración", añadió.

   Felipe VI va contar con escudu real y guión real propios dende'l mesmu momentu de la so proclamación como nuevu rei d'España, nos que va destacar la recuperación del tradicional fondu coloráu carmesí de la monarquía española.

   Proclamó que reafirma la so "fe na unidá d'España, de la que la Corona ye símbolu", y destacó que ye una España "unida y diversa" na que "cabemos toos".

   Deseó una España "na que nun se ruempan nunca les pontes del entendimientu", que ye ún de "los principios inspiradores" del espíritu constitucional.

   "Unidá nun ye uniformidá", dixo'l xefe d'Estáu, recordando que la Constitución de 1978 reconoz la diversidá como característica propia de la identidá española, diversidá que "engrandez" y tien que "fortalecer" a España. Y añadió que la mesma Constitución protexe les llingües d'España como "patrimoniu común".

   "Nesa España, unida y diversa, basada na igualdá de los españoles, na solidaridá ente los sos pueblos y nel respetu a la llei, cabemos toos; caben tolos sentimientos y sensibilidaes, caben toles formes de sentise español", manifestó.

   El rei Felipe VI tuvo una alcordanza especial pa les víctimes del terrorismu mientres el so discursu de proclamación ante les Cortes Xenerales, nel que defendió que la victoria del Estáu de Derechu ye "la meyor reconocencia a la dignidá que merecen".

   El monarca defendió que "na mirada al pasáu" d'España, qu'abogó que se faiga "sin señardá" y con "un gran respetu" hacia la so historia, tienen que tar "siempre presentes, con un inmensu respetu tamién, toos aquéllos que, víctimes de la violencia terrorista, perdieron la so vida o sufrieron por defender la nuesa llibertá".

   Rindió también sentíu homenaxe al so padre, Juan Carlos I, pol so reináu "escepcional" y por convocar a los españoles "a un gran proyectu de concordia nacional que dio llugar a los meyores años de la nuesa historia contemporanea".

   El monarca aprovechó'l momentu pa espresar tamién el so gratitú a la xeneración que fizo la Transición española, "qu'abrió camín a la democracia, al entendimientu ente los españoles y a la so convivencia en llibertá", añadió'l Rei.