El Conceyu Universitariu pol Asturianu, al traviés del so vocal de rellaciones institucionales, Inaciu Galán, ta acabante solicitar a la Universidá d'Uviéu un cambiu nel artículu 25.2 apartáu 'a' del Regalmentu de Doctoráu pa que la llingua asturiana y castellana tengan el mesmu tratu.

   Nuna nota de prensa, el CUPA recueye testualmente lo que diz esi artículu nesti momentu y el cambiu que se solicita: 'la memoria que recueye'l llabor realizáu na tesis doctoral redactaráse n'español", solicitándose qu'apaeza'l siguiente epígrafe: "la memoria que recueye'l llabor realizáu na tesis redactaráse n'español o n'asturianu'.

   Con esti cambiu, señala'l CUPA, "eliminaríense les condiciones especiales que s'esixen pa presentar la memoria de la tesis n'asturianu, que ponen a la llingua asturiana al nivel de llingües estranxeres, en llugar de como llingua propia de la Universidá d'Uviéu, yá que tal como se recueye nos sos estatutos nun pue discriminase a naide pol usu de la mesma".

   Acordies con esta normativa, y a xuciu del CUPA, l'actual reglamentu incumple dafechu les condiciones d'usu normal del asturianu fixaes nos Estatutos de la Universidá d'Uviéu, asina como na Llei d'Usu del Asturianu de 3 de marzu de 1998, dambos testos llegales de rangu superior al citáu en primer llugar.

   El CUPA recueerda que la solicitú faise nesti momentu aprovechando l'actual periodu de consultes a la comunidá universitaria por mor de delles modificaciones que se proponen dende l'equipu rectoral. Yá nel añu 2011 una reclamación del CUPA sobre esti mesmu Reglamentu, puestu en marcha esi añu, permitió que la primer vez l'asturianu apaeciera ente les llingües nes que podía presentase la tesis doctoral dientro d'un reglamentu, anque dende los años 80 del sieglu pasáu veníen faciéndose tesis n'asturianu.