Madrid. David Gallardo (E.P.)

   Siete años dempués del so anterior discu d'estudiu, la banda mexicana Molotov torna con 'Agua Maldita', un álbum de "muncho rock" y nel que, como nun podría ser d'otra manera, hai lletres incendiaries que nun dexen títere con cabeza al señalar inxusticies, corrupción y perversiones nel sistema.

   "Porque tienes tatuaxes pues ser un delincuente, cuando los 'corbatudos' son los peores delincuentes. Entiendo a daquién qu'asalta a otru por fame, pero non a un 'corbatudu' que va contra'l contribuyente. Pero ye que la corrupción y la delincuencia ye bien bultable a tolos niveles", calca a Europa Press el baterista Randy Ebright.

   N'almitiendo que "evidentemente" siguen teniendo ganes de fadiar a los poderosos colos sos cantares, Ebright almite que cuando Molotov publicó'l so primer discu él malpenes tenía 20 años, mientres qu'agora yá ta en 37. Por eso señala qu'anque "ves el mesmu mundu con otros güeyos, la perspectiva nun cambia tanto". "Pero trates de buscar otres palabres más elegantes", remacha con chancia.

   "Si la xente quier falar del amor, ye lexítimo. Si ye vixente pa un artista, eso va ser polo menos muncho más creíble nun escenariu. Yo falo de lo que me toca vivir, y si daquién ta nun mundu de color de rosa y quier retratalo con música, perfecto", repostia Ebright al cavilgar sobre'l conteníu de les lletres de Molotov.

"MUNCHU ROCK"

   Nesti puntu, Ebright calca en que 'Agua Maldita' ye un discu con "muncho rock", producíu por Jason Perry y coles collaboraciones de Money Mark y Run DMC. "A nengún de nós van confundimos con Pavarotti, sigue siendo como llatíu", bromia, pa dempués añadir que'l son "ye "bien crudu", pues grabóse "en vivo y en cinta, sin más producción".

   Nun evita Ebright esplicar los motivos polos que tardaron siete año en publicar nuevu material: "Teníamos un quintu elementu na banda, el mánager Jorge Mondragón, que se dedicaba a dividir y conquistar, asina que lu despidimos, enterámonos de too y garramos el timón".

   "Nun pudimos sacar un discu nesti tiempu porque tábamos bien mal cola discográfica, daqué que nun sabíamos, pero yera tamién por culpa de Jorge Mondragón. Enterámonos de por qué tábamos conxelaos y esclarámoslo too, hasta meyorando les condiciones del contratu", desvela.

   Por cuenta de esti tiempu sin llanzar nuevu material (mientres el que nun pararon d'actuar), cuando llegó'l momentu d'atropar cantares alcontráronse con más de 40, de los qu'escoyeron a lo último diez. "Asina que pronto va haber más discos", avanza Ebright, qu'amás añade que "lo guapo de ser mediu independiente ye que fais lo que te da la gana y tomes decisiones basaes na creatividá y non en númberos".

   La xira de presentación de 'Agua Maldita' va entamar en Méxicu esti de 4 de xunetu con un conciertu de baldre pa los que mercaren el nuevu álbum. Dempués va haber conciertos per Estaos Uníos antes de llegar a Europa n'ochobre (incluyendo España), pa tornar dempués a Suramérica a primeros del 2015. "Lo que más nos presta facer ye xirar", afirma Ebright.

   Formada en 1995 en Ciudá de Méxicu, la banda Molotov ta dende entós integrada por Ismael 'Tito' Fuentes, Miguel 'Miky' Huidobro, Randall 'Randy' Ebright y Francisco 'Paco' Ayala. Dende entós siempre se caracterizaron por un espíritu críticu y combativu que en 'Agua Maldita' algama una ruidosa madurez.