Roma (E.P.) .-El Papa Francisco sorrayó que la Ilesia nun ye una ONG y calcó en que nun tien que llenase nin al cleru nin al Vaticanu. "La Ilesia somos toos, non solo obispos y cures", sentenció mientres l'audiencia xeneral na Plaza de San Pedro.

   Na mesma llinia, esplicó que los cristianos "son xente que bendiz, que sabe bendicir", algamando l'aplausu de les persones aconceyaes en San Pedro.

   Per otru llau, fizo un llamáu a favor de "millones de families" de toles relixones que se ven obligaes "a fuxir de los sos países" y afirmó que Jesús tamién foi un "refuxáu" que conocía bien los sos "sufrimientos".

   Mientres la so catequesis, qu'a partir d'esti miércoles va tar dedicada a la Ilesia, el Pontífiz esplicó que la institución ésta "ye una realidá bien amplia, abierta a tola humanidá" y recordó que tien "una historia bien antigua" que "funde los sos raigaños nel Antiguu Testamentu" y que fundó Cristo".

   Al esplicar la historia de la Ilesia, destacó que lo primero que llama l'atención ye qu'a lo primero Dios nun llamó a Abraham namás "como individuu aislláu", sinón qu'acoyó tamién "la so casa, la so familia, los sos siervos". Relató que ye un fechu "inéditu" que Dios tome la iniciativa, porque "nun foi Abraham el que convocó esi pueblu". "Nun ye una obra humana pa la que se pide la bendición de Dios, ye Dios el que toma la iniciativa", afirmó.

   A lo último, comentó que la forma d'acoyese a la misericordia de Dios "ye reconocese pecadores" y que, precisamente, "la esperiencia cotidiana del amor de Dios" fai crecer a la Ilesia.