La frontera de Melilla sufrió esti miércoles un nuevu intentu de saltu per parte d'inmigrantes d'orixe subsaharianu, dempués de qu'un grupu numberosu que podría superar los 300 quisiera entrar pola triple valla a primeres hores de la mañana. De momentu, nengún accedió a Melilla.

   Según informaron a Europa Press fontes policiales, d'esos 300, la metá superó la primer alambrada pero alcuéntrense atrapaos na zona entemedia polo que nun se considera que pasaron a suelu español, dao que les autoridaes requieren pa ello que salten los trés barreres y superar el dispositivu policial que-yos fai frente nel mesmu perímetru fronterizu.

   La Guardia Civil retuvo a los inmigrantes que tán nel entrevalláu, unos 150, mientres Marruecos va faciéndose cargu d'ellos. El saltu rexistróse ente'l Ríu Nano y Mariguari sobre les 7.00 hores y la malla qu'instaló nestes selmanes el Ministeriu del Interior, que torga meter los deos pa poder esguilar l'alambrada, enzancó l'accesu de los inmigrantes. Lo mesmo qu'asocedió esti pasáu sábadu, cuando unos 1.000 subsaharianos protagonizaron un intentu de saltu y nengún accedió a Melilla.

   Ésti ye'l décimu saltu que rexistra la ciudá española del norte d'África nel primer semestre del 2014, nos que llograron pasar unos 1.800 inmigrantes. Nos dos últimos, que coincidió que yá ta instalada la nueva malla, nun se rexistró nenguna entrada.