Madrid (E.P.)  El ministru d'Economía, Luis de Guindos, refirióse al pidimientu del sector del taxi pa que'l Gobiernu zarre páxines web qu'ufierten servicios de tresporte alternativos como Uber, y afirmó que toos tienen que "axustase" a los medios tecnolóxicos, como lo ficieron sectores como'l de los medios de comunicación.

   Mientres la xornada inaugural del seminariu 'La Europa que dexa la crisis', entamáu pola Universidá Internacional Menéndez Pelayo (UIMP) en collaboración cola Asociación de Periodistes d'Información Económica (APIE), y patrocináu por BBVA, Guindos fizo esti analís dempués de que los taxistes se reunieren esti llunes col Ministeriu de Fomentu.

   De la mesma, el ministru d'Economía reconoció que "la competencia ye bien importante" y que "tien que desarrollase n'igualdá de competencia" pa que nun haya nenguna discriminación dende'l puntu de vista, por exemplu, del pagu d'impuestos, daqué que, añadió, el Gobiernu tenta de garantizar.

   Preguntáu entós por si l'altu costu de les llicencies de taxi pue ser un elementu distorsionador de la llibre competencia, Guindos aseguró que "ye un tema distintu". "El del taxi ye un sector reguláu y cada regulación establez una serie de condiciones", remachó.

FOTO: EUROPA PRESS