BAGDAD, (Reuters/EP).-Decenes d'iraquinos morrieron esti martes mientres la batalla por Baquba, la capital de la provincia de Diyala, al norte de Bagdad,  mientres que'l zarru de la principal refinería del país de resultes de la violencia dexó a amplies zones del país sin combustible nin eletricidá.

   Fuerces gubernamentales aseguren que tornaron un intentu per parte de los insurxentes de tomar Baquba n'intensos combates mientres la nueche. Dellos residentes y responsables indicaron qu'ente los muertos hai decenes de prisioneros d'una cárcel llocal, pese a qu'hai versiones enfrentaes sobre cómo morrieron.

   La televisión estatal informó de que les fuerces de seguridá tornaron ataques contra tres barrios de Baquba mientres la nueche. Diyala ye una provincia mista tanto étnica como relixosamente, y foi escenariu de bona parte de la violencia que se rexistró nel país mientres la ocupación ente'l 2003 y el 2011.

   Per otra parte, los milicianos tamién atacaron la población de Basher, nel norte del país y a 15 kilómetros de Kirkuk, habitada por turcomanos xiinos, pero tornáronlos, según la Policía.

   Los milicianos del Estáu Islámicu d'Iraq y Siria (ISIS), que la selmana pasada tomaron Mosul, la segunda ciudá del país, y llanzaron una ofensiva pel valle del Tigris, al norte de Bagdad, tán llogrando l'apoyu d'otres cañes sunines, incluyíos antiguos miembros del partíu Baaz del derrocáu Sadam Husein, que comparten el malestar de la minoría suní pola supuesta opresión del Gobiernu del chiín de Nuri al Maliki.

   Los países occidentales, incluyíu Estaos Uníos, encamentaron a Al Maliki a dialogar colos suninos pa reconstruyir la unidá nacional como única vía pa evitar la desintegración d'Iraq. Sicasí, Hassan Suneid, un estrechu aliáu d'Al Maliki, que llogró va dos meses la so reelección, alvirtió esti martes que la gobernante Alianza Nacional chiina va boicotiar cualquier trabayu col principal bloque sunín, Mutahidoon.

   "Nun ye posible que nengún bloque dientro de l'Alianza Nacional trabaye col bloque Mutahidoon por cuenta de la so última actitú sectaria", comentó en declaraciones a la canal de televisión del partíu d'Al Maliki.