Madrid (E.P.) .-Un xuez d'Instrucción de Madrid va tener que decidir si la supuesta fuga d'ún de los fíos del ministru de Justicia Alberto Ruiz-Gallardón en topetando contra otru coche'l fin de selmana constitúi una falta o un delitu, informaron a Europa Press fontes xurídiques.

   Tres los fechos, la Policía envió a los xulgaos l'atestáu policial, cola minuta de los axentes municipales, asina como la denuncia del conductor afectáu. Esta mesma mañana, la documentación xudicial llegó al rexistru de los xulgaos y va tener que repartise nos próximos díes, puesto que va con retrasu, según les mesmes fontes.

   Una vez que llegue, el maxistráu al que-y toque l'asuntu en cuestión tendrá de decidir si s'instrúi como un delitu ordinariu o como un xuiciu de faltes.

LOS FECHOS

   El pequeñu choque ente los dos coches tuvo llugar esti fin de selmana de nueche al altor del númberu 5 de la cai Almagro, nel madrilanu barriu de Chamberí.

   Dambos conductores baxáronse de los sos vehículos pa comprobar los daños pero ún d'ellos, que resultó ser Ruiz-Gallardón Utrera, volvió subise al suyu y metióse nun garaxe d'ún de los edificios de la plaza d'Alonso Martínez --onde reside'l ministru-- a escasos metros del llugar, según publicaba'l diariu 'El Mundo'.

   El segundu conductor decidió llamar a la Policía Municipal, sin más datos que'l númberu de matrícula del vehículu qu'escapara. Los axentes comprobaron qu'ésti taba rexistráu a nome d'Alberto Ruiz-Gallardón Utrera y punxéronse en contactu cola casa del ministru, pero'l conductor fugáu nun se punxo en nengún momentu a disposición de los axentes, según confirmaron a Europa Press fontes policiales.

   Dempués, el conductor denunciante, acompañáu d'axentes municipales, punxo una denuncia na comisaría de la cai de Leganitos, anque los axentes nun llegaron a denunciar, sinón que presentaron namás una minuta de lo asocedío, que s'apurrió a la denuncia, que va enviase a los xulgaos de la forma avezada.