Dende lo cabero del sieglu XIX hasta anguañu, el valle del Nalón vien siendo l’escenariu d’una descomanada actividá musical, coincidente na so totalidá, y no qu’a les estremaes especialidaes artístiques se refier, coles mesmes que tuvieron llugar na capital del Principáu d’Asturies.

D’esta forma, y dende les más ancestrales manifestaciones musicales de bandurria (rabel), gaita, tambor y tonada, pasando per una más que notable programación de múcia clásica (Sociedá Filarmónica Llangreana), y hasta les más novísimes propuestes rockeres, los cinco conceyos del Nalón fueron conformando a lo llargo del últimu sieglu y mediu un conciertu musical d’altor.

Agora, esta hestoria musical del Nalón llega a los estantes de les llibreríes de la mano del musicólogu Félix Martín Martínez, que publica asina los resultaos de la so tesis doctoral titulada “De la historia de la música del valle del Nalón: 1853-2003”., y que se presentó esti vienres na Casa de Cultura de La Felguera a partir de les siete y media de la tarde.

L’actu, presentáu pol director del programa Sones de Tpa, Ismael María González Arias, contó cola presencia del propiu autor, de la xoven cantadora Marisa Valle Rospo, del clásicu Gerardo Orviz y del gaiteru Pablo Carrera, ente bien de públicu que s’averó a sentir falar d’esta obra qu’abarca tolos tipos de modalidaes musicales, dende les bandes de música hasta la tonada y la época de les discoteques, con nomes de músicos y de grupos musicales conocíos en toles cuenques mineres y n’Asturies en xeneral.