Uviéu (E.P.) .-El presidente del Principáu d'Asturies, el socialista Javier Fernández, respondió al grupu d'IU na sesión plenaria de la Xunta Xeneral del Principáu d'Asturies qu'una república n'España nun significaría nin más empléu nin más crecimientu. A xuiciu del presidente asturianu lo que-y preocupa a los ciudadanos nun ye'l "falsu dilema" ente república y monarquía parlamentaria, sinón otres cuestiones como'l paru o la corrupción.

   De primeres, el voceru d'IU, Aurelio Martín, preguntára-y poles razones de que Fernández refugara públicamente la posibilidá de qu'a los españoles-yos consulten sobre si prefieren monarquía o república.

   El socialista recordó al voceru d'IU qu'hai poco que'l Congresu de los Diputaos yá refugó que se produxera un referendu "con una mayoría amplio y reforzada". Fernández señaló qu'él sí cree na democracia representativa. Amás, dixo que presumir de republicanu nun significa ser más demócrata.

   Ello ye que Fernández atribuyó a "ciertu oportunismu" d'IU defender agora esa posición. Y tamién a que "siente la vibración d'una coleta na so nuca", nuna clara alusión al líder de Podemos, Pablo Iglesias.

   Martín, sicasí, defendió la necesidá de consultar a los ciudadanos sobre esti asuntu. "Los españoles piden cambios, ye'l momentu de da-yos la palabra", indicó. Cuando s'aprobó la Constitución de 1978, la xente taba condicionada pol ruiu de sables", añadió.