Madrid (E.P.) .-La Sociedá Xeneral d'Autores y Editores (SGAE) negó que s'alcuentre en quiebra técnica, tal como recueyen dellos medios de comunicación, y señaló que va promover acciones llegales y disciplinaries contra'l sociu que fizo estes declaraciones, según anuncia esti vienres nun comunicáu.
La SGAE niega "dafechu" que se tea "maquillando la contabilidá", asina como que la entidá alcuéntrase en "quiebra técnica", y critica que "les acusaciones nun tienen fundamentu".
Los servicios xurídicos de la entidá tán estudiando les acciones llegales que procedan, "con independencia de les midíes disciplinaries que puean promovese poles inxuries y calumnies pronunciaes", tal como se contempla nos estatutos.
Según indica, les cuentes añales de la sociedá, ellaboraes pola Dirección Xeneral y la Dirección Económico-Financiera, presentáronse y esplicaron nes pre-asamblees d'esta selmana en 13 ciudaes españoles, y tán "debidamente auditaes" por Ernst & Young.
Nes pre-asamblees celebraes esta selmana los socios aprobaron les citaes cuentes por 1.481 votos a favor y 734 en contra y 341 astenciones, a falta de los datos de Toledo y Les Palmes de Gran Canaria. L'Asamblea Xeneral va celebrase'l próximu día 26 de xunu en Madrid.
La SGAE argumenta nesti mesmu comunicáu que les cuentes de la sociedá reflexen un resultáu negativa d'ocho millones d'euros, antes d'impuestos, "de resultes en gran midida de los axustes a los que se vio obligada la sociedá poles inversiones del pasáu na rede de teatru Arteria, les rémores d'una xestión fiscal y financiera inapropiada y los negativos acuerdos con dellos usuarios".
