Asturies recupera a partir del 1 de xunetu la conexón ente l'aeropuertu de Santiagu'l Monte y el de Lisboa, al traviés de l'aerollinia lusa TAP, que va entamar a operar el serviciu nesta fecha.
Asina lo confirmó esti xueves, Jesús Medela, delegáu de la compañía, en declaraciones a los medios mientres una xornada sobre posibilidaes d'inversión empresarial en Portugal. Matizó que van ofrecese seis servicios diarios y "a precios competitivos", con promociones que podríen partir de los 98 euros por billete d'ida y vuelta.
Va ser con aviones de 46 places y "si la ocupación ye bona vamos poder ampliar les frecuencies", esplicó Medela, qu'esclaró que nun se trata d'una ufieerta pa la temporada braniega. "Nun facemos apuestes estacionales, vinimos con toa intención de quedar", señaló'l delegáu, qu'afirma l'oxetivu de la compañía de facer "tolos esfuerzos al mediu plazu".
Destacó amás que los nuevos vuelos a Lisboa ofrecen conexones interesantes con América ya hasta con África o Europa, al traviés de la mesma TAP. Señaló como exemplu les sos ufiertes, tamién "con precios competitivos", a Miami, Nueva York o Brasil, conexón na que son cabezaleros en Portugal.
