La escritora británica J.K. Rowling, qu’anunciara’l so apoyu a la campaña del “Non” a la separación d’Escocia del Reinu Xuníu, recibió por ello nes redes sociales insultos y crítiques airaes, que fueron condenaos güei por detractores y partidarios de la independencia.

El ministru principal escocés, el nacionalista Alex Salmond, sostuvo pela so partee que tanto los partidarios de la independencia como J.K. Rowling, que respalda la campaña del “Non”, tienen derechu a expresar el so apoyu ensin recibir ataques de nenguna parte.

La polémica llevantóse depués de que Rowling, que vive n’Edimburgu dende va más de venti años, anunció que donara un millón de llibres (1,23 millones d’euros) a la campaña “Meyor xuntos”, promovida polos tres principales partíos británicos: conservadores, llaboristes y lliberaldemócrates.

La más grande polémica desatóla un mensaxe en twitter de la ONG Dignity Project, dedicada a axudar a la infancia n’África, nel que se tachaba a la escritora de “zorra” por apoyar el “Non” a la independencia cuando Edimburdu-y diera “abellugu cuando yera una madre soltera”.

Hores depués de que’l mensaxe fuera publicáu, la organización divulgó un comunicáu nel qu’aseguraba que la so cuenta de twitter fuera pirateada, polo que negó la so responsabilidá “sobre nengún tuit que s’unviara”.

Un portavoz de Yes Scotland, la campaña a favor del “Si” nel referendum sobre la independencia d’Escocia del próximu 18 de septiembre, criticó asinamesmo’l mensaxe de la ONG.