Amit Sood, director del Institutu Cultural de Google, afirma que la palabra clave detrás d’Art Project, la plataforma con más de 40 mil imáxenes d’alta resolución d’obres d’arte de tol mundu disponible con un solu clic, ye democracia.

L’obxetivu d’esti proyectu artísticu de Google ye facer l’arte más accesible pa toos, señaló Sood, nacíu en Bombay (India) y radicáu por mor del so trabayu en Londres, con motivu del llanzamientu de Street Art, una nueva collección dientro del Art Project reservada al arte urbanu.

El poder ver les obres d’arte que guarden unos 400 museos de tol mundu y les galeríes que faen los usuarios coles pieces de la so elección, demientres ún comparte’l so tiempu cola familia o los amigos, cámbialo too respestu al accesu al arte, sorrayó.

Unos 15 millones de persones visiten al añu la web d’Art Project y hai unos 8,5 millones de persones que son siguidores nes redes sociales d’esta iniciativa creada en 2011. De los alredor de 400 museos ya instituciones de tol mundu que participen hasta agora n’Art Project 23 son hispanoamericanos, correspondientes a ocho países.

Amid Sood destaca la importancia que tien Street Art pa la conservación d’un arte proclive pola so propia naturaleza a ser destruyíu o alteráu. “Les fotos y los videos de Stereet Art faen que l’arte urbanu perdure nel tiempu ensin que pierda la so espontaneidá, asina como internet pon les sos obres al algame de toos, ensin llímite d’espaciu nin de tiempu”, señala.

La iniciativa de crear Street Art ta nel éxitu que tuviera la incorporación d’una collección d’arte urbanu de Brasil a Google Art Project l’añu pasáu. Non solo los usuarios del Art Project manifestaron el so interés sinon que varies organizaciones dedicaes al arte urbanu punxéronse en contactu con Google pa poder integrase al proyectu.

“Del llau de Google tamién tuvimos interés d’explorar esto más, porque la incorporaciuón del arte urbanu ye una extensión de la mesma visión que motivó l’aniciu del Art Project: la de brindar más y meyor accesu a conteníos culturales de tol mundu”, señaló.