Uviéu.-Esti miércoles, 11 de xunu, a partir de les 12:30 h. nel Auditoriu d’Uviéu preséntase a los medios y a la sociedá asturiana la Plataforma de Docentes, Concertistes, Compositores ya Investigadores.

L’orixen y necesidá d’esta nueva Plataforma parte del fechu de que se vien produciendo dende va tiempu n’Asturies una situación insólita: restrínxese al máximu l’actividá concertística de los profesores de conservatorios que dependen del Principáu d’Asturies. Esta midida basóse, según la Conseyería d’Educación, na aplicación de la Llei 53/1984 d’Incompatibilidaes, a toes lluces restrictiva, y que ta provocando la interrupción –con peligru d’abandonu- de carreres artístiques o l’abandonu de la docencia d’otros profesores implicaos en proyectos artísticos.

Asturies conviértese asina, según los convocantes de la nueva Plataforma, nel únicu país d’occidente nel que se restrinxe l’actividá artística de los profesores de música. Ante esta situación, agravada nos caberos meses, los profesores movilizáronse creando esta plataforma que trata de solventar esta anómala situación fomentando’l debate ente les partes y aportando propuestes, meditaes y proporcionaes, y comunicando a la opinión pública la problemática y les sos posibles soluciones.

Les explicaciones pormenorizaes d’esta situación van dase nel actu de presentación del miércoles que vien. Na mesa van tar los cuatro miembros de la Plataforma escoyíos por ella pa la so xestión: Francisco Jaime y Pantín, profesor del conservatoriu d’Uviéu y concertista de piano, Manuel Paz, profesor del conservatoriu profesional del Nalón, miembru d’EntreQuatre y director de la Orquesta de Cámara de Siero, Alejandro Villar, profesor del conservatoriu profesional de Xixón y director del Ensemble Eloqventia y Aarón Zapico, ex profesor de los conservatorios profesional y superior d’Uviéu y director de Forma Antiqva.