Uviéu.-Esti domingu, a partir de les 12:00h, entregáronse nel Teatru Campoamor los premios del XXII Concursu y Muestra de Folclor Ciudá d’Uviéu, cola presencia d’Agustín Iglesias Caunedo, alcalde d’Uviéu, qu’inauguró yá la siguiente edición del concursu y presentó oficialmente al nuevu director, Juan Carlos Gonzálezs, sustitutu de l’anterior director, el desaparecíu periodista Carlos Menéndez Jeannot.

Cola presencia na primera parte de tolos finalistes nes modalidaes de canción asturiana masculina, femenina y xuvenil, de gaiteros solistes, pareyes de baille y agrupaciones corales, pasóse a la segunda nes qu’intervinieron con una pieza tolos ganadores de toles modalidaes.

Estos ganadores fueron: Premiu José Marcilla al Meyor Coro a la Schola Cantorum Virxen del Carbayu; Premiu Antón Sastre Bilbao a la Meyor Pareya de Baille a Carla Blanco y Adrián Fernández; Premiu La Busdonga a la Meyor Cantadora de Tonada a Lorena Corripio; Premiu Carlos Jeannot al Meyor Intérprete de Tonada Xuvenil a Alejandro peláez; Premiu Remis Ovalle al Meyor Gaiteru Solista a Jesús Fernández; y Premiu Manolo Delgado al Meyor Cantador de Tonada a Jorge Tuya.

Arriendes de les actuaciones d’estos ganadores de cada modalidá, intervino l’Ensame, el Quinteto Da Capo, María Lanza y Alfonso Carrera, Rosario González, Vicente Prado El Pravianu, el Che de Cabaños, Juan Antonio López Brañas y la Banda Gaites Ciudá d’Uviéu.