Dos de les cuatro fíes del rei Abdalá d’Arabia Saudí que denunciaron en marzu tar reteníes pol so padre colgaron esta mañana un videu en YouTube nel que piden a la comunidá internacional auxiliu pa ser lliberaes.

Sahar Bint Abdalá al Saud, ataviada con una hiyab (velu que cubre’l cabellu) denuncia que’l rei y los sos medio hermanos Mutaib y Abdelaziz tan privándoles dende va más d’una década de comida y agua. Amás, critica que “el mundu enneru tea viendo lo que ta pasando y tea esperando a que dalgún tipu de traxedia suceda”.

La otra hermana presente nel videu, Yawaher, demanda a les organizaciones de derechos humanos, Naciones Xuníes, activistes, llíderes y gobiernos que “vengan y vean por ellos mesmos l’actu criminal que se ta cometiendo equí, nesta casa” y que les lliberen inmediatamente. Yahawer continúa la so alocución y acusa a la comunidá internacional de ser “responsable y cómpliz del rei saudí y los sos fíos nesti actu criminal”.

Según Sahar, la Cruz Roxa mandó un escritu a la Media Lluna Roxa pa que ficiera dalgo al respecto, pero non obtuvo nenguna respuesta, según ella, porque’l presidente d’esta organización ye’l mediu hermanu d’ella Faisal Bin Abdalá.

Sahar y Yawaher Bin Abdalá al Saud denunciaron el pasáu mes de marzu ser prisioneres del so propiu padre, el rei Abdalá Bin Abdelaziz, al qu’acusen de teneles piesllaes dende va 13 años, xunto a otres dos hermanes, en dos cases nel interior del palaciu real de la ciudá de Yeda.