Madrid (E.P.).-El xuez de l'Audiencia Nacional Pablo Ruz constató que les obres que se llevaron a cabu ente los años 2005 y 2011 na sede del Partíu Popular (PP) na cai Génova de Madrid podríen ser constitutives d'un delitu de fraude fiscal y otros de falsedá documental y contable.

   Asina consta nun autu nel que'l xuez cita a declarar como imputaos el próximu 7 de xunetu a la socia y trés antiguos trabayadores de la empresa Unifica Servicios Integrales, que llevó a cabu los trabayos. Trátase de Belén García, socia del director xerente de la empresa, Gonzalo Urquijo; Laura Montero, que foi directora de Proyectos d'Unifica; María Rey, xefa de la obra; y Claudio Montero, xefe de Proyectos nel 2008

   A otru día van declarar como testigos l'antigüu xefe de Seguridá del PP y cuñáu del antigüu tesoreru Luis Bárcenas, Antonio de la Fuente; el caxeru de la formación Luis Molero; y otros dos emplegaos del estudiu d'arquitectura, Ester D'Opazo y Noelia Fernández Muñoz.

   El maxistráu tomó esta decisión dempués de qu'un informe de l'Axencia Tributaria y otru de la Unidá de Delincuencia Económica y Fiscal (UDEF) apuntaren que'l PP pagó una parte de les obres con dineru negro que podríen correspondese colos apuntes de 888.000 euros que Bárcenas anotó na so contabilidá B como salíes pa Urquijo.

"REALIDÁ DE LOS APUNTES CONTABLES"

   Los dos informes vienen constatar, según el xuez Ruz, "la realidá de los apuntes contables" conseñaos por Bárcenas en relación coles obres del PP y el so calter delictivu, dao que "en delles plantes del edificiu les obres entamaron sin existir presupuestu aprobáu por ambes partes y n'otres ocasiones el presupuestu presentáu nel Colexu d'Arquiteutos nun coincidía col supuestamente acordáu ente'l PP y Unifica".

   Ruz destaca que, según acrediten dellos correos electrónicos d'Unifica, en cuatro plantes del edificiu ellaboraron dos "certificaciones finales" de les obres, "una que correspondía a la factura xirada y otra, de cantidá superior, que supuestamente respondía al preciu real del proyectu".

   L'informe de Facienda, que por mandatu de Ruz namás analiza los delitos fiscales que cometería l'estudiu d'arquitectura y non el PP, caltién que la diferencia ente unes certificaciones y otres abonaríense con dineru B. Asina, la documentación confiscada en setiembre pasáu na sede d'Unifica pon de relieve un descuadre de 211.160,77 euros nes factures correspondientes a les obres de la planta segunda, de 274.880,35 nes de la quinta, de 256.426,33 nes de la tercera y de 217.879,75 nes del cuartu pisu.

   Ruz destaca la "correlación" d'estes cantidaes con trés apuntes que l'extesoreru del PP anotó na so contabilidá B ente marzu y avientu del 2008 como salíes pa 'Gonz. Urquijo', 'Gonzalo (Arquitectu)' y 'G.O.'. Trátase, en concreto, de 258.000 euros apuntaos el 13 de marzu (supuestamente correspondientes a les obres de la planta quinta), 235.000 el 31 de xunetu (de la planta tercera) y otros 200.000 n'avientu (de la cuarta).

   Pa ello, el maxistráu instructor tien en cuenta'l "supuestu descuentu" d'ente l'ocho y el diez por cientu que, según declaró Bárcenas, aplicóse sobre les cantidaes sin facturar, esto ye, abonaes con dineru procedente de la caxa B del PP.

   En relación cola segunda planta de la sede, na que según Facienda existía un desfase de 211.160,77 euros, el maxistráu señala que se constataron "determinaos trabayos supuestamente sin facturar por Unifica" que, una vez aplicáu'l descuentu del que falaba Bárcenas, coincidiría con otru apunte contable por valor de 195.000 euros que l'extesoreru anotó'l 28 de xineru del 2008.