Frankfurt. Alm.(E.P.) - El Conseyu de Gobiernu del Bancu Central Européu (BCE) recortó esti xueves los tipos d'interés del euru hasta dexalos nun nuevu mínimu históricu del 0,15%, y colocó la primer vez na historia la tasa de depósitos en niveles negativos, cumpliendo asina coles mires de los mercaos, que daben por descontaes estes midíes.

   En concreto, la institución presidida por Draghi informa nun comunicáu de que recortó los tipos d'interés dende'l 0,25% nel que los dexó nel mes de payares del 2013, hasta un nuevu mínimu históricu del 0,15%.

   Coles mesmes, tamién va cobrar la primer vez na historia a los bancos por guardar el so dineru, al dexar el tipu d'interés aplicable a la facilidá de depósitu nel -0,10%, una midida que los analistes desconocen qué impactu va tener.

   De terceres, el BCE tamién rebaxó'l tipu d'interés aplicable a la facilidá marxinal de creitu en 35 puntos básicos, hasta quedar nel 0,40%, con efectos, igual que les otres dos rebaxes, a partir del 11 de xunu del 2014.

   Coles mesmes, adelanta que va haber más midíes de política monetaria pa meyorar el funcionamientu del mecanismu de tresmisión de la política monetaria, que va anunciar el presidente del BCE, Mario Draghi, na avezada rueda de prensa de les 14.30 hores.

   Darréu, va detallar estes midíes nuna nota de prensa que va publicase a les 15.30 hores, cuando va ofrecer tamién más detalles sobre la implementación de la tasa negativa de depósitos.

   Los mercaos creen que Draghi va anunciar un plan pa favorecer la circulación del creitu bancariu, anque con condiciones y una estructura distinta a la que teníen les anteriores inyecciones de lliquidez al llargu plazu.

   Amás, tán pendientes de si aprueba un programa de compra de deuda, anque, en casu de que pase, refúgase que seya del tamañu y les característiques de los adoptaos pola Reserva Federal (Fed) o'l Bancu d'Inglaterra.

   La tasa d'inflación na zona euru xustifica amás l'adopción de midíes d'estímulu adicionales, dao que según los datos preliminares d'Eurostat baxó otra vuelta nel mes de mayu hasta'l 0,5%, en comparanza col 0,7% d'abril.

   Tampoco foi positivu'l datu del Productu Interior Brutu (PIB) de la zona euru nel primer trimestre del 2014, que ralentizó la so espansión al 0,2% al respecto de los trés meses anteriores, una décima menos que la rexistrada l'últimu trimestre del añu pasáu.