Esti sábadu 7 de Xunu a les 12:00 hores va celebrase nel Centru Tomás y Valiente de Les Vegues el primer conceyu abiertu del Círculu de Podemos Corvera.

Los resultaos de les pasaes eleiciones europees fixeron de Podemos una pieza clave na política actual. Sicasí, la entrada nes instituciones europees nun ye más que'l principiu d'un camín de llargu percorríu empobináu a recuperar la democracia a tolos niveles, incluyíu'l local.

Ye por eso que se fai más necesariu que nunca articular al conxuntu de la población corverana, xenerando nueves dinámiques de participación ciudadana y alternatives de cambéu positivu. En Corvera sabemos que llegó la hora de trabayar polos nuesos pueblos, polos nuesos barrios, pola nuesa xente, y encaramos con ilusión el momentu de construyir, ente toos y toes, soluciones pa los problemes reales de les persones de Corvera.

Pa ello vamos cuntar, a partir de les 12 h, coles intervenciones de Pablo Corral (Podemos Castrillón) y les candidates al Parlamentu européu Tania González (Avilés) y de Lucía Montejo (Corvera), dempués de lo que va celebrase el conceyu abiertu a tolos participantes, nel que se va dar en constituyir formalmente'l Círculu.

Convidamos a toles persones de Corvera y contorna a participar nesti actu ilusionante y d'alderique.