La Fundación Solomon R. Guggenheim presentó esta mañana en Helsinki un concursu arquitectónicu internacional pa diseñar un nuevu muséu de la franquicia neoyorquina en pleno centru de la capital finlandesa dedicáu al diseñu, l’arquitectura y la tecnoloxía, con un coste estimáu en 130 millones d’euros.

El concursu, primero qu’organiza la Fundación Guggenheim en tola so hestoria, va ser xestionáu pola consultora británica Malcolm Reading, en collaboración cola ciudá de Helsinki, l’Estáu finlandés y l’Asociación Finlandesa d’Arquitectos.

L’ayuntamientu de Helsinki reservó pal muséu un solar d’alredor de 20 mil metros cuadraos na zona sur del puertu, de los que 12 mil metros cuadraos diben destinase al edificiu, con un espaciu expositivu asemeyáu al del muséu Guggenheim en Nueva York.

Un xuráu internacional compuestu por onde miembros, ente los que figura l’arquitectu español Juan Herreros, va elexir en payares los seis proyectos finalistes y los sos creadores van tener hasta marzu de 2015 pa perfeccionar los sos diseños.

La Fundación Guggenheim calcula que’l nuevu muséu, que se va sumar a les sos otres sés en Nueva York, Bilbao, Venecia y Abu Dabi, diba atrayer a unos 550 mil visitantes al añu, principalmente del norte d’Europa y Rusia, y el so impactu económicu diba ascender a 41 millones d’euros.