Madrid (E.P.) .-Ún de cada trés españoles (un 36 por cientu) múestrase tolerante hacia ún o más comportamientos de maltratu como les amenaces verbales, la desvalorización o la violencia de control sobre la pareya, según revela l'I Estudiu de Percepción social de la violencia de xéneru 2013, presentáu pola Delegación del Gobiernu pa la Violencia de Xéneru y la Secretaría d'Estáu de Servicios Sociales y Igualdá.
L'informe, ellaboráu pol profesor de Socioloxía de la Universidá Autónoma de Madrid, Gerardo Meil, basándose nes respuestes de 2.580 entrevistaos mayores de 18 años, reflexa qu'un 92 por cientu de la población española --tanto homes como muyeres-- considera "inaceptable" la violencia de xéneru na pareya frente a un 6% que lo ve como "daqué inevitable que siempre existió" y un 2% que lo considera "aceptable en delles circunstancies".
Sicasí, un 36% tolera dellos comportamientos que tamién constitúin maltratu. Asina, sobre un 30% de los encuestaos acepta como inevitable o aceptable en delles circunstancies la violencia de control (un 29% de muyeres y un 32% d'homes); aprosimao un 10% tolera la desvalorización de la pareya (un 8% de muyeres y un 10% d'homes); y sobre un 7% acepta les amenaces verbales (un 6% de muyeres y un 7% d'homes). Otra manera, la violencia sexual y física namás son aceptaes por un 2%.
La secretaria d'Estáu d'Igualdá, Susana Camarero, calificó de "gran meyora sobre fai non munchos años" el fechu de qu'un 92% de los españoles refugue la violencia de xéneru, anque mostróse preocupada polos munchos encuestaos que "nun identifiquen" delles actitúes --como'l control sobre la ropa de la pareya, les amistaes, el trabayu, los celos-- como maltratu.
Estes actitúes, según alertó, danse igualmente nos adolescentes, ente los qu'un 28% (de les moces) asegura sufrir dalgún tipu de control per parte de la so pareya. Por ello, anunció que la próxima campaña de sensibilización 'Hai salida' del 2014 va dir dirixida a los adolescentes p'alvertir de les primeres señales del maltratu y promover un usu responsable de les nueves tecnoloxíes
FOTO: EUROPA PRESS
