Tres l'abdicación del rei, la llucha escontra la monarquía española tien de dir de la man de la llucha por una Asturies llibre y soberana.

Andecha Astur llama a la sociedá asturiana a participar nesti momentu hestóricu en toles movilizaciones que se convoquen escontra la monarquía española y a defender que la so fin seya l'entamu d'una Asturies llibre y soberana, dueña del so futuru y ensin ataures nin vasallaxes col Estáu español.

La cris na que s'atopa'l modelu políticu deriváu de la reforma del franquismu, incapaz d'aparar les reivindicaciones democrátiques de los Pueblos nin de la ciudadanía, vese espeyao na abdicación del rei y ye tamién una amuesa de la falta de llexitimidá na que s'atopen los partíos nos que s'encontia esti réxime, de lo que los resultaos d'estes elleiciones europees son una bona amuesa d'ello. 

Andecha Astur alvierte de que l'abdicación del monarca español nun supón de por sigo dengún cambiu, si  nun somos quien a que les fuercies polítiques qu'hai 35 años pasaron pola transición franquista ensin francer con ella, camuden de comportamientu y opten pola defensa de los más ellementales drechos democráticos.

Nesi sen Andecha Astur siguirá trabayando por una República Asturiana llibre y soberana, y alvierte del pelligru que se cuerre si la llucha escontra la monarquía española acaba siendo a favor d'una República española que torne a ser la ñegación de los drechos de los Pueblos y les presones, nuna nuea agresión a los drechos nacionales y sociales del Pueblu Asturianu, polo que considera que ye preciso la mayor movilización y acumulación de fuercies posible nesta xera común de llibertá y soberanía p'Asturies.