Una de les formaciones de danza y recuperación folclórica más significatives d’Asturies cumple 15 años con un alcuentru musical nel Teatru Filarmónica d’Uviéu, esti sábadu 7 de xunu, a partir de les siete de la tarde.

Un festival de música nel que se va tener la oportunidá de ver dende la formación más pequeña de Filandón, Los Pichones, hasta l’agrupación de mayores, uan de les más reputaes del momentu dientro de lo que ye’l baille tradicional.

Xunto a ello va tenese la oportunidá de ver a bien d’otres formaciones. Ente les que destaca la presencia de Mayalde, posiblemente’l meyor espectáculu en directo que nestos momentos se pue ver n’España rellacionáu cola canción tradicional. Y, xunto a ellos, bandes de gaites como Xácara, el grupu de pandereteres Perendengue o músicos como Xuacu Amieva, Fe Santoveña o Marta Elola.

Too ello en xunto pa un espectáculu de noventa minutos de duración nel que se va dar un repasu a los bailles asturianos dende l’oriente al occidente y nel que los amantes de la música asturiana van tener arriendes la oportunidá de ver delles actuaciones más.