La Mocedá d'Izquierda Soberanista - Darréu - entamó esti sábadu 31 de mayu una xornada montañera de mocedá que percorrería parte de los conceyos de Bimenes y Llaviana. Anque'l día nun acompañó con muncho orbayu y con una borrina que nun mos dexó en nengún momentu una veintena de mozos y moces acudimos a esta xornada col envís de pasar una esperiencia de compañerismu, montañismu, memoria hestórica y xermandía.

Entamamos en Fayacaba pasaes les diez y media de la mañana cola nuesa ruta, ascendiendo a Campa Gües y depués aportando al Pozu Funeres, una sima onde delles persones foron tiraes, dalgunes vives, demientres la Dictadura Franquista pol fechu de pensar diferente. Ellí entamamos un emotivu homenaxe al pie de la sima dende'l respetu y l'alcordanza yá que dende Darréu entendemos que nun podemos perder la nuesa memoria como pueblu y como clas.

Un compañeru intervinó recordando los fechos ellí asocedíos con munchos datos d'interes y d'una forma mui emotiva. Depués la intervención de Darréu cientrose n'actualidá, onde un PSOE desclasáu y españolista dafechu acude tolos años a homenaxear a unes persones que probatiblemente sintiríen vergoña si s'alcuentre col partíu d'anguaño, vendíu al capital y actor y executor del Réxime monárquicu de 1978. Finamos l'actu d'homenaxe cola interpretación de la flor del agua cola gaita y dexando un ramu de lloréu delláu de la sima.

Depués, tres faer ya un bon camín y bonos kilómetros tuvimos qu'aparar porque'l borrín entamaba a convertise n'una torga braeramente seria p'ascender al Picu la Triguera. Baxamos de nuevu a Campa Gües y cellebramos ellí una xinta de xermandía, onde tuvimos el meyor de los tratos y onde animamos el chigre colos nuesos cantares y les nueses gaites.

Dende Darréu queremos da-y les gracies a tola xente qu'acudió a esta xornada y valoramos perpositivamente la xornada pesie a la torga climatolóxica. Camentamos que ye perimportante conocer el nuesu país col so valor paisaxísticu y el so valor hestóricu y toes y toos los qu'acudimos deprendimos daqué. Amás ye fundamental afitar vínculos ente la mocedá cola fin de meyorar personal y organizativamente. Tamién queremos siguir llamando a la mocedá asturiano consciente a axuntase a la llucha de forma organizada y poder cuntar pa otres xornaes con más mocedá.