Madrid (E.P.) .- Valencia y Madrid, dos de les federaciones más fuertes del PSOE por númberu de militantes, apostaron esti xueves por que la presidenta andaluza y cabezaleru del partíu n'Andalucía, Susana Díaz, seya la próxima candidata del PSOE a la secretaria xeneral nel congresu estraordinariu que va producise nel mes de xunetu.

   La relevancia d'estos apoyos finca na importancia numbérica d'estes federaciones. Nel 38 Congresu Federal que'l PSOE celebró en Sevilla en febreru del 2012, la delegación andaluza suponía aprosimao'l 25 por cientu, de los delegaos, 234 d'un total de 972.

   La segunda federación por delegaos foi Cataluña, con 101. Pela so parte, Valencia y Madrid, con 87 y 79 delegaos respectivamente, fueron la tercer y cuarta federaciones con más representación, circunstancia qu'agora nun cambió.

DENDE ANDALUCÍA VEN "LLLÓXICA" LA REACCIÓN

   Dende'l PSOE andaluz vese "llóxico" que distintos secretarios rexonales del partíu empiecen a pronunciase sobre les sos preferencies dempués de que Madina plantegara la posibilidá d'optar a la Secretaría Xeneral.

   "Ye una clara reacción al movimientu de Madina", indicaron a Europa Press dellos socialistes andaluces, dempués de que dellos barones territoriales manifestaren públicamente'l so deséu de que la presidenta de la Xunta dea un pasu al frente pa dirixir el PSOE.

   Esta tarde, tanto Ximo Puig, como Tomás Gómez, respectivos secretarios xenerales de Valencia y Madrid, espresaron el so apoyu pa que Susana Díaz lidere'l PSOE a partir de xunetu. Puig aseguró que Díaz "representa'l cambiu que precisa'l partíu y pude dar la estabilidá que requier el partíu dempués de les elecciones europees".

   Pela so parte, Gómez aseguró que l'oxetivu de tolos socialistes ye que'l próximu congresu torne nel entamu d'un tiempu nuevu pal partíu y pa España.

LA RIOJA, CANARIES Y ARAGON

   Nes últimes hores tamién s'ubicaron a favor de la candidatura de Susana Díaz los líderes del partíu en La Rioja y Canaries. En declaraciones a Europa Press, el rioxanu César Luena defendió que la presidenta andaluza ofreza "fortaleza y unidá y encarnaría un nuevu lideralgu qu'aporte credibilidá y llexitimidá, que ye lo que ta esperando la sociedá".

   Tamién el canariu José Miguel Pérez posicionóse a favor de la candidatura de Susana Díaz, indicando que nestos momentos "la prioridá ye "dexar los egos, los personalismos y los intereses particulares pa centrase nel fortalecimientu del PSOE nun contestu de desafección ciudadana pa cola política".

   Coles mesmes, el secretariu xeneral del PSOE aragonés, Javier Lambán, defendió que la política andaluza seya la nueva líder del partíu, argumentando que precisen un lideralgu fuerte, con un ampliu apoyu dientro y fuera del partíu.