Madrid (E.P.) El ministru del Interior, Jorge Fernández Díaz, desveló esti miércoles nel Congresu de los Diputaos los resultaos de la investigación interna abierta al teniente coronel de la Guardia Civil Antonio Tejero Díez, fíu del golpista Antonio Tejero Molina, por celebrar nes instalaciones del Institutu Armáu una comida de conmemoración del 23F. Según dixo, esa información reservada diz que nun s'incurrió en nenguna infracción disciplinaria y precisó qu'a esti mandu cesáronlu por perda de confianza.

   El ministru fizo esti anunciu dempués de que'l diputáu del PSOE Antonio Trevín reprochára-y qu'un error suyu provocó que l'Audiencia Nacional anulara'l cese del fíu de Tejero y obligó al Ministeriu a restituyilu nel so puestu. "Pído-y más prudencia y rigor, en primer llugar la información reservada entamó dos díes depués de tener conocencia y, por reservada, nun la voi facer pública, pero nun prexulgue usté les circunstancies que motivaron dichu cese que yo sí conozo: el cese nun ye por razones disciplinaries, sinón por perda de confianza", retrucó Fernández Díaz.

   El ministru acusó al diputáu socialista de facer "declaraciones bien graves". "Ta faciendo afirmaciones sobre la base de lo que lleó en medios de comunicación. Yo sabíalo porque tengo esa información reservada y por esa información reservada nun se deriva responsabilidá disciplinaria", insistió, de la que recordó que'l fíu de Tejero nun tornó al so puestu anterior porque tres l'autu xudicial asignóse-y otru destín en réxime de comisión de servicios por esa perda de confianza.

   Amás dixo qu'a Antonio Tejero Díez "revaluáronlu pal ascensu" y apuntó que nel so momentu "ascendió a capitán un 23F y non por eso hai qu'establecer nenguna relación de causa efectu".