Tropes tailandeses detuvieron a un ministru del gabinete qu’emerxió desafiante del so escondite pa condenar el güelpe militar de la selmana pasada y llamar al restablecimientu del gobiernu civil no que fue la primera aparición pública d’un integrante del gobiernu depuestu.

Alredor de media docena dre soldaos detuvieron al Ministru d’Educación Chaturon Chaisang nuna escena caótica ocurrida nel Clube de Corresponsales Extranxeros en Bangkok, onde taba acabante de dar una conferencia de prensa.

La xunta militar que tomara’l xueves pasáu’l poder retuvo a los cabezaleros integrantes del gobiernu ellectu del país asiáticu y ordenó al restu que se rindiera. El Ministru d’Educación desafió la orden de presentase ante la xunta militar y salió del so escondite esti martes pa condenar el güelpe d’estáu protagonizáu poles fuerces armaes tailandeses.

Chaturón, un críticu declaráu de la intervención militar faló con periodistes y díxo-yos que diba resistir l’arrestu y diba dise a la clandestinidá, porque aporfiaba n’exercer los sos derechos y la so llibertá pa llamar al retornu de la llibertá y la democracia al so país.

De la que la conferencia de prensa diba finando y Chaturón siguía siendo entrevistáu por periodistes tailandeses, un grupu de soldaos entró nel salón y escoltólu a la salida ente l’abadía de periodistes.