Esti sábadu l’asociación y grupu folclóricu Los Yerbatos organiza en Bimenes un gran festival de música tradicional, centráu principalmente nel baille y la tradición de cantares a pandereta, que va contar con una llarga riestra de collaboraciones.

Asina, amás de los miembros menores, medianos y mayores de la formación Los Yerbatos, en Martimporra van dase cita voces consagraes como les d’Anabel Santiago y Héctor Braga, voces mui queríes nel llugar pol so trabayu como maestros de les nueves xeneraciones y pola so collaboración de siempre pa con ellos nos diferentes trabayos que vienen realizando dende l’asociación y el conceyu.

Dende va más de quince años, xente d’esti conceyu vien trabayando por conservar y esparder les tradiciones de Bimenes, conceyu de la Comarca de la Sidra. Los sos intereses siempre se centraran en recuperar los vieyos cantares y los vieyos bailles del llugar, defender l’usu y fomentar l’empléu de la llingua asturiana y l’acentu propiu de Bimenes como valor fundamental de la so cultura, y conservar el patrimoniu cultural d’Asturies, asina como promover l’interés pola cultura asturiana.

El festival va arrancar a partir de les siete la tarde, nel polideportivu del colexu de Martimporra y tien prevista una duración aproximada de noventa minutos. Como programa va ser grabáu pola TPA pa la so posterior emisión al traviés de Sones, siendo presentáu por Sonia Fidalgo.