Los ministros de Defensa, Celso Amorim, y Xusticia, José Eduardo Cardozo, precisaron que’l plan de seguridá pa la cita del fútbol mundial inclúi a 100 mil efectivos de la policía y a 57 mil más de les tres fuerces armaes, con actuación coordinada pol Ministeriu de la Presidencia.

D’alcuerdu colos ministros, va haber un gran centru de coordinación en Brasilia, que va tar en comunicación “permanente” con otros que van ser instalaos nes otres once ciudaes sés del Mundial.

Nel eventu van participar les selecciones de 32 países y cada una va poder unviar al país un máximu de 7 policíes, que van trabayar en coordinación colos organismos de seguridá brasileños.

El ministru Cardozo cifró en 700 millones d’euros les inversiones del gobiernu en materia de seguridá pal Mundial, qu’incluyeron la compra d’armes de “baxa letalidá”, cámares d’alta definición y equipos d’intelixencia, ente otros. Cardozo reiteró que, en rellación a los hinches que pudieran aportar del exterior, “hai un intercambiu d’información colos otros países”, que van unviar llistes de sospechosos, a los que “se-yos va facer un siguimientu especial” o a los qu’incluso se-yos va poder negar l’ingresu al país.

En cuantes a la posibilidá de protestes durante’l Mundial, asemeyaes a les que l’añu pasáu marcaran la Copa Confederaciones de la FIFA, Cardozo y Amorim coincidieron en que van ser toleraes siempre y cuando seyan pacífiques. “La imaxen de Brasil ye la d’una democracia vibrante, na que los ciudadanos manifiéstense llibremente”, afirmo Cardozo.