“Escontra de lo que siempre dixera, enxamás renunciara al confort del capitalismu nin escoyó vivir con austeridá”, escribe Juan Reinaldo Sánchez, qu’a lo llargo de 17 años fuera guardaespaldes de Fidel Castro y qu’agora publica un llibru sobre la vida privada del líder de la revolución cubana.

Yates lluxosos, una vaeintena de residencies repartíes per tola islla o partíes de caza “a lo Luis XV”, tanto nes frondoses provincies del norte como nos privilexaos fondos marinos, son dellos de los detalles que saca a la lluz “La cara oculta de Fidel Castro”, escrito xunto al periodista francés Axel Gylden y que va llegar a les llibreríes franceses na selmana viniente.

El comandante curióse enforma de mantener llueñe de la vista de los cubanos la so vida privada, “el secretu meyor guardáu de la Revolución”, asegura Juan Reinaldo según los estractos del llibru.

L’home qu’acompañó cásique a diariu a Fiderl ente 1977 y 1994 describe’l lluxose yate del líder, Aquarama II, copiáu del d’un allegáu del réximen de Fulgencio Batista, con cuatro motores, que-y regalara’l dirixente soviéticu Leonidas Breznev. Fondeáu nel so puertu priváu de Bahía de Cochinos, cada paséu del barcu implica tou un despliegue, qu’inclúi otros dos navíos, ún d’ellos totalmente medicalizáu, una patrullera militar y varios aviones n’alerta pa evitar que’l comandante sufra un atentáu.

En xeneral. l’Aquarama II val pa dar afayaízos paseos marítimos, pero tamién pa dir a Cayo Piedra, una pequeña islla asitiada nel sureste de Cuba, un “paraísu pa millonarios” nel que Castro asela arrodiáu de lluxu. Namás el tiempu fuera bonal, Fidel y la so muyer Dalia acudíen cada fin de selmana a Cayo Piedra, demientres que na temporada de lluvies el comandante prefería la caza del patu na mansión La Deseada, asitiada na provincia de Pinar del Río.

Negún cubanu d’a pies penetrara na islla secreta, a la que namás aportaba un grupu reducíu de privilexaos. Reinaldo Sánchez recuerda al expresidente colombianu Alfonso López Michelsen, al empresariu francés Gérard Bourgoin, conocíu como’l “rei del pitu”, el propietariu de la CNN Ted Turner o’l dictador de la República Democrática Alemana Erich Honecker. Anque los que más d’avezu diben yeren l’escritor Gabriel García Márquez y l’heroe de la revolución Antonio Núñez Jiménez.

Nuna d’eses visites, indica l’autor, Fidel propunxo a Gabo llanzase a la conquista de la presidencia colombiana col apoyu de Cuba. Lo que nun consiguió con García Márquez, tener un peón en Colombia, llogrólo años más tarde con Hugo Chávez en Venezuela.