El grafiteru británicu Bansky fue elexíu personalidá del añu n’internet a lollargo de los Webby Awards, que premien cada añu a pioneros de la rede de redes. L’artista, qu’enxamás fuera formalmente identificáu y vive recluyíu, fue recompensáu por una exposición organizada n’ochobre pasáu sobre les cais de Nueva York.

Bansky nun acudió a recibir el premiu. La canmtante Patti Smith, que tenía d’entrega-ylu, ironizó: “Tengo de confesavos dalgo, Bansky soi yo”. La recompensa fue enregada al presentador de los Webby Awards, el comediante Patton Oswalt, que lleyó un discursu del artista.

Cola so exposición Better out than in (Meyor dientro que fuera), Bansky cautivó a un ampliu públicu, al que cada día-y ufiertaba una nueva obra d’arte de cai nel so sitiu www.banskyny.com y na so cuenta d’Instagram.

Delles de les sos obres fueron duramente criticaes polos propietarios de les cases nes que fueron pintaes, asina como pol alcalde neoyorquín de la época, Michael Bloomberg.

La ceremonia conmemoró tamién el 25 aniversariu del nacimientu de la World Wide Web. El so inventor, Tim Berners-Lee, refirióse al debate sobre la neutralidá d’internet. “Internet tien de ser gratuita, abierta y neutra. Depende de nosotros”, dixo baxo un ábanu d’aplausos.

Los Webby Awards premien la excelencia n’internet. Creaos en 1996, esti añu recibieron unes 12 mil candidatures provenientes de cerca de 60 países