Palma de Mallorca (E.P.) .- L'Axencia Tributaria (AEAT) confirmó, per mediu d'un estensu informe entregáu esti martes al xuez instructor del casu Nóos, José Castro, qu'Iñaki Urdangarin defraudó más de 240.000 euros al fiscu ente'l 2007 y el 2008, refugando d'esta manera les alegaciones que presentó recientemente'l duque de Palma al maxistráu, según informaron fontes xurídiques a Europa Press.

   D'esta manera, Castro yá tien sobre la mesa la pericial que-y permitirá contar con conclusiones más precises nes que basase de cara a incluyir al home de la infanta Cristina nel autu col que va poner fin a la instrucción de la causa y decidir, poro, si tamién caltién la imputación de la mesma fía del rei como cooperadora de los delitos fiscales presuntamente cometíos pol so home.

   Tanto la Fiscalía Anticorrupción y l'Abogacía del Estáu, en representación de l'Axencia Tributaria, imputen dos delitos fiscales a Urdangarin por refugar les sos obligaciones no qu'al IRPF refierse, lo que reafirmó Facienda nel so últimu informe.