Un xuez federal en Las Vegas rechazó’l vienres una solicitú de los propietarios d’una patente pa impidir la proyección d’un holograma de Michael Jackson programada pa la ceremonia de los Premios Bilboard d’esti domingu. El xuez Kent Dawson falló escontra de la demanda de les compañíes tecnolóxiques Hologram USA Inc. Y Musion Das Hologram Ltd. al argumentar que nun esistía evidencia asgaya pa demostrar que l’holograma diba violar les patentes d’eses empreses.

L’holograma nun se mostró na corte, pero hasta l’audiencia desconocíase si los rumores del so empléu pal espectáculu yeren ciertos. Los abogaos de los heriedes de Michael Jackson y los productores del espectáculu argumentaron que la so tecnoloxía yera distinta a la que producen los demandantes.

Hasta l’audiencia, los productores de la gala nun confirmaran l’usu d’un imaxen en 3D de Jackson na ceremonia, pero tuvuieran promocionando una actuación “hestórica” del músicu na MGM Grand Garden Arena de Las Vegas que diba sirvir pa promover l’álbum póstumu del cantante, “Xscape”.