Valladolid (E.P.) .- La xueza dispunxo, esta madrugada, la prisión provisional, comunicada y sin fianza, de Montserrat G.F., autora confesa de la muerte a tiros de la presidenta de la Diputación, Isabel Carrasco, y de la so fía de Montserrat Triana M.G.
Les deteníes, imputaes pola muerte de la política lleonesa, fueron conducíes a la prisión de Villahierro, na localidá lleonesa de Mansilla de les Mulass, dempués de qu'ayeri declararen por separao nel Xulgáu, ante xuez, fiscal y abogáu de la defensa.
La primera en facelo foi la madre, y la so declaración prollongóse dende les 20 hasta les 24.00 hores, tres lo que foi'l turnu de la fía, de 35 años, qu'emprestó declaración dende les 24 hores hasta les 04.15 hores d'esta madrugada.
La xueza, n'escuchando les dos declaraciones y atendiendo al pidimientu del fiscal, acordó la prisión preventiva al dase les condiciones qu'obliguen según la llei d'Enxuiciamientu Criminal.
Según esta llei, y pola gravedá del delitu, podríen acabar condenaes polo menos a un delitu d'homicidiu penáu con hasta 20 años de cárcel, amás de que la xuez considera qu'existe riesgu de fuga, y la posibilidá de sustrayese a l'acción de la Xusticia, pol altu numbero d'años de prisión que conlleva'l posible delitu cometíu.
Coles mesmes, decretóse la prisión de les dos muyeres ante la posibilidá de torgar o interferir na investigación de los fechos delictivos, al existir una tercer persona implicada que nesti momentu ta en llibertá y que se trata d'un axente de Policía Llocal de Lleón, amiga de Montserrat Triana M.G.
Nesti momentu, los delitos que podríen imputase a les muyeres son homicidiu, atentáu a l'autoridá y tenencia illegal d'armes
Del conteníu de les primeres declaraciones de los dos muyeres ante la xueza nun pue revelase nada, al tar secretes les actuaciones por existir una tercer persona implicada, mientres que la instrucción sigue, a la espera de conocer l'informe final de l'autopsia y de que la xueza cite a declarar a dellos testigos de los fechos, ente otres cuestiones.
FOTO: Europa press
