Madrid (E.P.).-El Ministeriu d'Industria, Enerxía y Turismu publicó esti xueves nel Boletín Oficial del Estáu (BOE) la cantidá final que les compañíes eléctriques tienen que devolver a los consumidores acoyíos a la tarifa regulada nel primer trimestre del 2014, que sube a un total de 310 millones d'euros.

   El Gobiernu estableció esti mecanismu de compensación pa los pequeños consumidores nel real decreti llei que fixó'l preciu de la lluz pa los trés primeros meses del añu en 48,48 euros por megavatiu hora.

   Según esti real decretu, les eléctriques devolveríen el dineru facturáu de más en casu de que'l preciu nel mercáu resultara inferior al previstu.

   Como efectivamente'l preciu del mercáu d'eletricidá nel primer trimestre del añu foi de 26,27 euros por megavatiu hora, les compañíes eléctriques van tener que devolver a los pequeños consumidores les cantidaes cobraes por demás, qu'en conxunto sumen 310 millones d'euros, incluyendo impuestos.

   Industria precisó que la cantidá a devolver a cada pequeñu consumidor va depender del so consumu nesi periodu. Pa un consumidor domésticu tipu de 3,3 quilovatios de potencia contratada y 3.000 quilovatios de consumu añal van devolvése-y 25,5 euros.

   Nel casu d'una familia media con dos fíos de 4,4 quilovatios de potencia contratada y 3.900 quilovatios de consumu añal van devolvése-y 33,2 euros.

LA DEVOLUCIÓN ESTREMADA NA FACTURA.

   La devolución va producise na primer factura que'l consumidor reciba col nuevu sistema de facturación, con un plazu máximu hasta'l 31 d'agostu, y va venir claramente estremada en conceptu separao de la factura. Nel casu de que'l consumidor yá tea nel nuevu sistema, va recibir la devolución na so siguiente factura.

   El nuevu sistema de Preciu Voluntariu pal Pequeñu Consumidor (PVPC) establecíu pol Gobiernu cambió la forma de calcular el preciu de la enerxía na factura del pequeñu consumidor.

   A partir del pasáu 1 d'abril pasó a considerase directamente'l preciu del mercáu d'eletricidá, lo que, según Industria, permite aumentar la tresparencia y abaratar el costu de la enerxía al suprimir el costu d'aseguramientu implícitu del anterior sistema de puyes Cesur.

   Una vez que les empreses entamen a facturar col nuevu sistema, van venir de forma automática a axustar, de la mesma forma a como se fizo agora pal primer trimestre, les cantidaes facturaes a partir d'abril col preciu real qu'haya nel mercáu.