Milicianos separatistes prorrusos de l'autoproclamada República Popular de Donetsk bloquiaron l'accesu a una base de les Fuerces Armaes ucranianes na capital de la rexón y esixeron a los militares qu'aporten les sos armes y abandonen l'acuartelamientu, informaron fontes separatistes a l'axencia de noticies rusa ITAR-Tass.

   Los milicianos de la Guardia Popular de la República de Donetsk solicitaron a los militares ucranianos qu'entreguen les sos armes voluntaries y agora alcuéntrense negociando colos sos mandos. "Tamos calteniendo conversaciones colos oficiales al mandu y reclamando que dexen les armes", esplicó un voceru de la República Popular de Donetsk.

   Amás, aseguró que la población de delles poblaciones de Donetsk sigue instalando puestos de control pa torgar el pasu de los militares de les Fuerces Armaes ucranianes que siguen desarrollando la denominada operación antiterrorista, que los separatistes definen como una operación de "castigu".

   El departamentu de Comunicación de los separatistes de Donetsk aseguró que delles persones resultaron firíes en combates rexistraos cerca de la ciudá de Slaviansk esti miércoles.

   Un día antes, les autoridaes separatistes de Donetsk informaren sobre los enfrentamientos rexistraos ente milicianos separatistes y los axentes de la nueva Guardia Nacional, dirixida poles autoridaes de Kiev, nes poblaciones d'Oktiabrskoie y Dimitrovka, cerca de Kramatorsk. Les mesmes fontes afirmaron que los separatistes llograron poner fuera de serviciu dellos vehículos de combate. (E.P.)