L’Ayuntamientu Bimenes va entamar un homenaxe a los hermanos Luis y Armando Montes Fernández, gaiteru y cantante de tonada respeutivamente, el prósimu sábadu 17 de mayu, de magar les 12’00 hores, en Melendreros (Bimenes). L’actu consistirá nel descubrimientu d’una placa que se va llantar al pie de La Fonte La Pipa, a la salida’l pueblu en direición a Fayacaba.

Contaráse con una intervención del Alcalde de Bimenes, Alejandro Canteli Rozada, que tamién entregará un pequeñu detalle a Armando Montes y a la familia de Luis Montes, por desgracia yá desapaecíu en 2013. Amás, nel trescursu del mesmu actuarán una pareya de gaita y tambor del Ensame de Música Tradicional Los Yerbatos y la cantante de tonada Alicia Villanueva Megido, una de les mayores promeses d’esti xéneru. Pondráse-y el ramu al homenaxe con una pequeña espicha.

Tovía nun se cumple l’añu de la desaparición del gaiteru Luis Montes, a los 89 años. Yera hermanu d’Armando Montes, una de les grandes voces del últimu mediu sieglu pasáu y que sigue teniendo una llarga montonera de siguidores yá que dexara una bona serie de tonaes grabaes.

Armando entamara cantar dende bien mozu y empezó faciéndolo como cantaor flamenco. Acompañáu pol maestru Cortés a la guitarra, fízose profesional del cante en 1955, actuando per toa España. Diez años más tarde, preséntase al concursu de canción asturiana de Turón y algama’l primer premiu. Dende esi momentu emprima a actuar xunto al grupu folclóricu de Mariano Castro Los Xustos.

Nel añu 1971 preséntase al V Concursu de la Canción Asturiana del diariu Región y algama’l primer premiu. Ye d’esti tiempu cuando se tienen les primeres grabaciones de canción asturiana. Cuenta con más d’ochenta rexistraes en vinilu.