Paraguay, un país nel que’l 57% de la población sufre sobrepesu, alcontró una forma diferente de combatir la discriminación hacia les persones obeses: la cellebración d’un concursu de belleza llamáu “Miss Gordina”, que pretende elevar la autoestima de les muyeres con unos kilos de más.

“Tola mio vida fui gorda pero siempre fui guapa”, comentaba Asunción Montserrat Monges, profesora de música y estudiante de Psicoloxía, tres de recibir el galardón de Miss Gordina 2014. Dende l’escenariu, con tacos y un vistíu de gala roxu y ampliu escote, Monges dedicó’l so minutu de fama a les persones que la discriminaben nel colexu.

Quince concursantes desfilaron pol escenariu ente lluces de neón y música hardcore en dos modalidaes, delantre d’un públicu formáu por centenares de familiares y amigos. El desfile tuviera precedíu del show de les Gordines Sexys, una actuación de baille de la Miss 2013, Diana Chamorro, y baillarines con y ensin sobrepesu.

Pa Chamorro, de 25 años, estudiante de Medicina del últimu cursu, llevar el títulu de Miss Gordina 2013 trúxo-y “coses doloroses y munches allegríes”. Y aseguró sentise aliviada por dexar el cargu que compaxinaba colos sos estudios de Medicina y les práctiques nel hospital.