Jean-Luc Godard ye ún de los artistes emblemáticos de la “nouvelle vague” del cine francés. A los sos 83 años, compitió seis veces nel Festival de Cannes, pero la Palma d’Oru siempre-y fuera esquiva. El so filme, “Adieu au langage”, nel qu’experimenta col 3D nun llargumetraxe –yá lo ficiera nun curtiu-, podría reivindicalu nesta etapa de la so carrera.
A diferencia de Godard, los hermanos Jean-Pierre y Luc Dardenne, aportaron seis veces a Cannes y ganaron la Palma en dos ocasiones. Los belgues van buscar la tercera cola cinta “Deux jours, une nuit”.
Olivier Assayas, que fuera nomináu tres veces a la Palma d’Oru, vuelve a Cannes con “Sils María”, sobre una actriz de 18 años qu’algama l’éxitu al interpretar nuna obra a Sigrid, una moza qu’induz al suicidiu a una muyer mayor, Helena. Venti años más tarde, ofrécen-y interpretar el papel d’Helena.
Per quinta vez, David Cronenberg aspira upase con una Palma dorada. “Maps to the Stars” cuenta la hestoria d’un terapeuta qu’escribe llibros d’autoayuda y que convive con una muyer sobreprotectora, un fíu que tuviera con una antigua estrella de la televisión en rehabilitación y una fía qu’acaba salir del psiquiátricu, amás de cola so meyor clienta, una famosa actriz.
Mike Leigh recibiera tres nominaciones y una Palma, por “Secretos y mentiras” (1996). Agora regresa pa presentar “Mr. Turner”, un biopic sobre l’inglés Joseph Mallord William Turner, artista románticu, consideráu’l más grande pintor de paisaxes del sieglu XIX.
Otru inglés, Ken Loach, recibiera en 2014 el Premiu del Xuráu Ecuménicu de Cannes pol conxuntu de la so obra. El realizador tien presentao nel certamen 17 de les sos películes, 11 na sección oficial a competición. Namás una consiguió’l gran premiu, “El viento que acaricia la cebada” (2006). Pa esta edición aporta con “Jimmy’s Hall”, una cinta hestórica sobre Jimmy Gralton, un activista políticu irlandés que ye deportáu del país nos años 30. Fundador del Partíu Comunista d’Irlanda, Gralton pasó los sos últimos díes nos Estaos Xuníos.
Con malapenes 25 años, Xavier Dolan pisó Cannes cuatro veces. El canadiense, que se diera a conocer na Quincena de Realizadores en 2009 con “J’ai tué ma mère”, entra esta vez en competición con “Mommy”, otru firle centráu nes rellaciones materno-filiales.
Namás una cinta llatinoamericana destaca na sección oficial, “Relatos salvajes”, del arxentinu Damian Szifron. La cinta producida por Pedro Almodóvar, ye descrita como un filme llocu na narración, surrealista, incoherente, que vien col aquel d’esconsonar La Croisette.
En xunto, son 18 películes les que participen na sección oficial del Festival de Cannes. Pa munchos, el comentariu ye de que lleguen los autores de siempre. Pal director del Festival, lleguen en verdá los fideles al certamen, porque más qu’un Festival de cine, el concursu parezse a un llugar de cultu.
