Con motivu de la cellebración de la XXXV Selmana de les Lletres Asturianes la televisión autonómica asturiana va facer una reposición del llargumetraxe El rostru impenetrable (One-Eyed Jacks), dobláu al asturianu por Gonzali Producciones. Sedrá mañana sábadu, 10 de mayu, a les 18,15 hores.

El rostru impenetrable (ficha técnica) ye un western de 1961 fechu n’Estaos Xuníos d’América, dirixíu y protagonizáu por Marlon Brando, y ta interpretáu por Marlon Brando, Karl Malden, Pina Pellicer, Katy Jurado, Ben Johnson, Slim Pickens,Larry Duran, Sam Gilman, Timothy Carey, Miriam Colon, Elisha Cook Jr., Rodolfo Acosta y Hank Worden. Foi la única película dirixida por Marlon Brando. En 1961 tuvo nominada al Oscar na categoría de Meyor Fotografía (collor) y llogró la Concha d'Oru a la meyor película nel Festival de San Sebastián.

La Radiotelevisión del Principáu d’Asturies fizo una primera emisión el 27 ’avientu de 2013 con una cuota de pantalla del 5,1 por cientu, superior a la media de la canal d’esi mes, que s’asitió nun 4,7 por cientu. Esta emisión, al traviés del hashtag #ElRostruImpenetrable, foi ún de los espacios más comentaos na nueche d’esi vienres ente los usuarios de Twitter n’Asturies, xenerando más d’un 80% de comentarios positivos.

El doblaxe d’El Rostru Impenetrable (ONLINE ) ye’l programa más vistu de ‘TPA a la carta‘, teniendo superao la cifra de 53.000 reproducciones

Illán Gonzali dirixó y produció’l versionáu, con un repartu de más de venti dobladores, ente ellos Carlos Novoa, José Antonio Lobato, Ana Blanco Rozada, Ana Díaz Morán, Andrés Presumido, Carlos Alba, Alberto Rodríguez, Silvino Torre, Lluis Antón González, Olga Cuervo, Eladio Sánchez, Verónica Gutiérrez, Marisa López Diz, Ángel Héctor Sánchez, Norberto Sánchez, Carlos González, Begoña Faro, Mario Artidiello, Samuel Gradín, Hugo García, Carlos Rodríguez, Jéssica de la Paz, Xulián García y Fernando de Luxán. L'Academia de la Llingua Asturiana foi responsable del asesoramientu lingüsísticu.

SINOPSIS:                                                                 

Tres d'atracar un bancu fronterizu Rio vese traicionáu por Dave, el so meyor amigu y compañeru de correríes. Apresáu polos rurales mexicanos pasa cinco años nel presidiu de Sonora d'onde escapa pensando en vengase. Al poco alcuentra a Dave, qu'agora ye un home respetable y sheriff de Monterrei.