Por Ismael González Arias.- Acaben de cumplise 10 años de la muerte de Silvino Fernández Fueyo, Silvino’l de Laipata. Un bon momentu pa recuperar la memoria d’una tarde d’aquel mesmu añu nel que morrió, sentaos delantre d’una botellina sidra na terraza de la sidrería Alberto de Mieres. Malapenes cuatro meses más tarde morría’l que fuera ún de los gaiteros más influyentes na maestría del acompañamientu a la gaita.

¿Que canción sabe tol mundu y ponse a cantala cuando tien dos copes de más?

SA: “Villaviciosa hermosa”, lo más normal. Pero cuando’l borrachu ye del mundu la tonada, entós toca o “Xilguerín parleru” o “Carretera d’Avilés”.

¿Dalguna más habrá?

SA: Dalguna. Pero, nun te creas, el repertoriu a eses hores ye mui reducíu.

Nun nos hai falta llegar al momentu nel que la xente nun se tien de pie.

SA: “Villaviciosa hermosa” val pa toles ocasiones.

Hasta pa tocar a la gaita.

SA: Si quieren acompañamientu de gaita, dícente: a ver, ho, a ver si me sigues, sabes esa que diz... y canten “Villaviciosa hermosa”.

Vaya aburrimientu.

SA: Ye lo que tien tar mamáu.

¿Por qué te prefieren a tí los cantadores de tonada?

SA: Porque sé los cantares.

¿Dalgo más habrá que saber?

SA: Saber los cantares, conocer al que los canta y saber por quién los va a cantar.

¿Dalguna importancia tendrá tocar bien la gaita?

SA: Bien poca. La gaita acompaña.

Tamién la guitarra nel fado o nel flamenco y hai que ser bon guitarrista.

SA: El meyor gaiteru acompañante de tonada ye’l que subió al escenariu detrás del que canta, termina d’acompañalu y tu dices: esi cantaor ye un fenómenu.

¿Un buen gaiteru realza a un bon cantador?

SA: Cuando dalguién canta bien a la gaita, siéntese a gusto con ella, sabe dir al par d’ella... nun hai nada más grande.

¿Sigue dalgún gaiteru de los mozos la to escuela?

SA: La escuela mía tien poca ciencia.

¿Conocer les tonaes?

SA: Ye fácil. Tampoco son tantes.

¿Y conocer a los que les cantaron?

SA: Eso dátelo’l tiempu.

¿Y a los que les cantan agora?

SA: A la segunda vuelta tú ya sabes ónde respira, cuánto quier descansar, cómo da les vueltes, cuándo resuelve.

¿Hai que tener bona oreya?

SA: Na mio casa siempre se cantó tonada.

To madre, Amable Fueyo.

SA: Sí. Tenía una voz mui natural, mui bien terciada. Yera un cantar mui distintu al d’agora.

¿En qué yera distintu?

SA: Yera la voz neta.

¿Qué significa eso?

SA: Ensin reblicoques. Ensin adornu nengunu pa concursu. La voz que disfruta cantando.

¿Cambia muncho una voz de cuando canta en chigre a cuando lo fai sobre un escenariu?

SA: Hai voces pa chigre y voces pa escenariu.

¿Y tendrá d’haber voces pa los dos sitios?

SA: Nun te creas. El chigre mató munches grandes voces. Nun se pue tar cantando y bebiendo hasta les tantes y querer tar espléndidu al día siguiente.

¿Tantu concursu nun estropia tamién les voces?

SA: Los concursos estropiáronlos los presentadores.

¿Qué ficieron, entós?

SA: Tu, ¿a qué vas a un concursu?

A sentir a los cantadores.

SA: Eso ye. Y, ¿a qué vas a una muestra o a un memorial?

Supongo qu’a lo mesmo.

SA: Pues, eso.

Eso, ¿qué?

SA: Que les tonaes duren dos minutos y ente tonada y tonada tenemos qu’aguantar el sermón de la montaña.

A mi sorprédeme particularmente que sean tan pedantes y que sigan empleando un palabreru propiu de mitá del sieglu pasáu.

SA: Son insoportables.

Ye lo que tenemos.

SA: Eso ye lo triste.

Ye la herencia de la Radio del Movimiento. Tovía siguen empleando los mesmos tics y los mesmos adxetivos.

SA: Son munchos pa tirar del mesmu tetu.

¿Los presentadores?

SA: Son más los que quieren vivir d’ello.

¿Más? ¿Quién?

SA: Los entendíos, los xuraos, los representantes, los maestros, los propios cantadores...

Entendíu ye tol mundu.

SA: Tócate sentir opinar a cada ún qu’espanta.

Nesto y en cualquier cosa.

SA: Pero nesto vienen a date llecciones.

Daránteles los maestros.

SA: Hai y hubo maestros escepcionales.

¿Tovía los hai?

SA: Nes dos cuenques. Esta siempre fue cantera de grandes maestros. Xente que sabía lo que dicía y lo que facía.

Seguro qu’esto tien que ver con que d’equí salieran grandes voces.

SA: Y nun salieron más porque se perdieron elles soles pel camín.

Otra vez el chigre.

SA: El chigre ye como’l Congresu.

Atacáu de diputaos.